Audiotechnique Lincoln Cheng
上個月講過我偏向虎山行，接受Audio Note 老總 皮疍叔的挑戰，借了旗艦級分體CD機CDT 6＋5th Element 回草廬配搭全套M10 Signature + Gaku-On 開聲，本來諗住它們的規格只係16bit / 44.1kHz，既冇升頻，亦冇re-clock ，更冇jitter reduction ，對住我套dCS四季理應冇運行，不過既然掛住AN的頭牌，點都要認真對付！豈料隨著run in 時間愈長，我愈聽愈流冷汗，因為靚聲程度完全出乎意料之外！我前後招呼過接近廿人前來草廬作客品評，包括三爺，Leo 兄，Paul 少和一衆寫手兄弟，結果人人聽到猛爆粗口，因為完全唔明白如此還原基本步的設計，點可能會靚聲如斯！！！結果要捱到上個星期音響技術截稿當日，才肯定自己佰份佰冇聽錯！這套CD組合的聲音具有超凡的分析力，細節達到纖毫畢現的境界，速度高，動態大，能量感豐厚而沒有犧牲任何弱音的細節，空氣感豐富到不得了，最最最厲害之處是不論人聲，弦樂，銅管樂，木管樂，敲擊樂，甚至是電子音樂，都有極度像真的感覺！雖然它不能播SACD，但我只有幾十張單層SACD，而CD卻有幾仟張，想落沒有太大損失，經過前思後想，左量右度之後，睇嚟這套9件頭Audio Note 組合註定是拆㪚不了，要長駐草廬的了！
Search